Qusar rayonu ərazisində avqustun 30-da Daxili Qoşun hissələrinin sələfilərə (vəhabilər) qarşı keçirdiyi əməliyyatla bağlı cinayət işi açılıb. Baş Prokurorluqdan ANS PRESS-ə verilən məlumata görə, Azərbaycan Cinayət Məcəlləsinin 120-ci (qəsdən adamöldürmə) maddəsi ilə başlanmış cinayət işinin istintaqı Ağır Cinayətlərə Dair İşlər üzrə İstintaq İdarəsində aparılır. Hadisənin təfərrüatları barədə isə əlavə məlumat verilmir.
Qeyd edək ki, Qusarın Dağıstanla həmsərhəd Həzrə kəndi yaxınlığında Azərbaycana qanunsuz keçmək istəyən vəhabilərlə qarşı əməliyyat keçirilib. Hadisə zamanı Daxili Qoşunların əsgəri Bakının Binəqədi rayon Hərbi Komissarlığından hərbi xidmətə çağrılmış, müddətdən artıq hərbi xidmətdə olmuş 23 yaşlı Əli Yolçuyev öldürülüb, hadisəni törədən şəxslər qaçıb.